കനത്ത മഴ; ഇരിമ്പിളിയം കൊടുമുടിയിൽ കിണറും മോട്ടോർപ്പുരയും ഇടിഞ്ഞുതാഴ്ന്നു

ഇരിമ്പിളിയം: ചൊവ്വാഴ്ച പെയ്ത ശക്തമായ മഴയിൽ കിണറും മോട്ടോർപ്പുരയും ഇടിഞ്ഞുതാഴ്ന്നു. ഇരിമ്പിളിയം ഗ്രാമപ്പഞ്ചായത്തിൽ കൊടുമുടിയിലെ പീടിയേക്കൽ മുല്ലപ്പള്ളി വീട്ടിൽ നരേന്ദ്രകുമാറിന്റെ കൃഷിയാവശ്യത്തിന് ഉപയോഗിക്കുന്ന മോട്ടോറും ത്രീ-ഫെയ്‌സ് കണക്‌ഷൻ ബോർഡുമുള്ള മോട്ടോർപ്പുരയുമാണ് ഇടിഞ്ഞ് താഴ്ന്നത്. സമീപത്തുകൂടെ ഒഴുകുന്ന തൂതപ്പുഴയിൽ വെള്ളം ഉയർന്നതോടെ കിണറിനടിയിൽ അനുഭവപ്പെട്ട മർദമാണ് ഇടിയാൻ കാരണമെന്നാണ് കരുതുന്നത്. കിണറിന് പതിമൂന്ന് മീറ്റർ ആഴമുണ്ട്. സംഭവത്തിൽ കളക്ടർക്ക് പരാതി നൽകി.